‘Yn gweithio mewn partneriaeth i ddarparu rhaglenni gwyliau o safon uchel, gan roi cam ymlaen i bobl ifanc i’r gamp neu’r gweithgaredd y maen nhw wedi’i ddewis.’

Mae Datblygu Chwaraeon yn gweithio’n agos â phartneriaid cymunedol ac adrannau eraill yn y Cyngor, i gydlynu rhaglen weithgareddau yng ngwyliau haf ysgolion. 

Amcanion y gweithgareddau hyn yw cwrdd ag anghenion canfyddadwy ystod oedran eang, bod yn gwbl gynhwysol i bob un plentyn ac arwain at gyfranogiad tymor hir e.e. drwy gynnig cyfleoedd i ymuno â chlybiau chwaraeon lleol.

Os oes gennych ymholiad penodol ynghylch Rhaglenni Gwyliau, a wnewch chi lenwi ein Ffurflen Ymholiadau Cyffredinol Datblygu Chwaraeon os gwelwch yn dda.

8Heini

Os na wyddoch chi beth i’w wneud yng ngwyliau’r ysgol yna ’does dim rhaid ichi edrych dim pellach!  Mae’r rhaglen gwersyll Aml-chwaraeon 8Heini yn cynnig amrywiaeth eang o weithgareddau i’ch cadw’n brysur.

Mae’r gwersylloedd yn canolbwyntio ar 8 o chwaraeon (athletau, pêl-fasged, badminton, criced, pêl-droed, hoci, pêl-rwyd a rygbi).  Cynhelir sesiynau nofio fel ychwanegiad opsiynol ble mae’r cyfleusterau ar gael.

Mae’r sesiynau’n pwysleisio sgiliau a thechnegau sylfaenol gan ddarparu ar gyfer dilyniant.  Bydd gwersyllwyr yn derbyn sylw arbenigol drwy’r holl wersylloedd a byddant yn cael eu hannog i wella mannau gwan tra’n dal i ddatblygu ym mhob un o’r chwaraeon.  Mae’r gwersylloedd wedi’u hanelu at rai 8 – 16 mlwydd oed o unrhyw allu ac o’r naill ryw neu’r llall.

Sioeau ar Daith 8Heini

Mae’r fenter ei hun yn estyniad o’r fenter 8Heini lwyddiannus a redwyd mewn Canolfannau Hamdden a Llecynnau Gemau Aml-ddefnydd ar draws y sir.  Mae’r sioeau ar daith 8heini yn wersylloedd estyn allan cymunedol aml-chwaraeon, sy’n targedu trefi llai a phentrefi Sir Ddinbych.

Mae pawb sy’n cymryd rhan yn derbyn sylw arbenigol drwy’r holl wersylloedd ac yn cael eu hannog i wella mannau gwan tra’n dal i ddatblygu ym mhob un o’r chwaraeon mewn amgylchedd o hwyl a chwarae teg.  Mae’r gwersylloedd wedi’u hanelu at rai 8 – 16 mlwydd oed o unrhyw allu ac o’r naill ryw neu’r llall.

Diwrnodau Chwaraeon Dŵr

Caiff y diwrnodau chwaraeon dŵr eu cynnal yn y Marine Lake, Y Rhyl.  Mae’r sesiynau’n rhedeg o 10am – 4pm ac yn cynnwys gweithgareddau chwaraeon dŵr megis canŵio, caiacio, hwylio, bwrddhwylio ac adeiladu rafftiau i rai 8 oed i Oedolion.