Gweithgareddau Ysgol 5 x 60

NEWYDDION

Mae Ysgol Brynhyfryd ac Ysgol Uwchradd Y Rhyl yn ddigon ffodus i fod yn rheng flaen un o Raglenni Datblygu Chwaraeon diweddaraf Cyngor Chwaraeon Cymru.

Cyflwynwyd rôl Trefnydd Chwaraeon Ysgolion Uwchradd ym mis Medi 2004, yn y lle cyntaf fel swydd ran-amser a phrosiect peilot yn cael eu cyllido gan y Cyngor Chwaraeon, yn edrych ar gynyddu’r ganran o ddisgyblion ym mlynyddoedd 7, 8 & 9 sy’n cymryd rhan mewn gweithgaredd corfforol allgyrsiol rheolaidd.

Mae llwyddiant y chwe phrosiect peilot ledled Cymru wedi arwain yn awr at gyflwyno’r swydd ym mhob sir drwy Gymru i gyd, dan faner Swyddog Datblygu Chwaraeon 5x60. Mae teitl y swydd yn dangos y pwyslais i blant fod yn cymryd rhan mewn gweithgaredd corfforol 5 gwaith yr wythnos am o leiaf 60 munud. Mae’r swydd yn amcanu at annog datblygiad cysylltiadau, strwythurau a rhwydweithiau rhwng ysgolion, clybiau chwaraeon, hyfforddwyr, cymunedau a chyrff llywodraethol chwaraeon er mwyn gwella’r cyfleoedd ar gyfer hamdden llawn mynd a chyfranogiad ar bob lefel.

Mae’r rhaglen 5x60 yn amcanu at archwilio ffyrdd, drwy ysgolion, o greu amrywiaeth ehangach o chwaraeon a gweithgaredd corfforol yn ystod amser allgyrsiol, yn cynnwys brecwast ac amser cinio, ond yn arbennig nosweithiau’r wythnos a phenwythnosau, i bob plentyn ni waeth be fo’u gallu. Mae’r cynllun yn amcanu’n arbennig at dargedu cyfleoedd i blant nad ydynt yn cymryd rhan ar hyn o bryd a cheisio mynd i’r afael â rhai o’r ffactorau sy’n annog rhai ifanc llai galluog i beidio â chymryd rhan.

Y Lansiad

Mae Cynulliad Cymru a Chyngor Chwaraeon Cymru wedi lansio rhaglen £7.6m i annog mwy o blant ysgol uwchradd yn y wlad i ddod yn ffit a chadw’n ffit.
Mae’r cynllun 5x60 yn cael ei enw o darged Cynulliad Cymru o weld 90 y cant o blant yn cymryd rhan mewn 60 munud o ymarfer cymedrol o leiaf bum gwaith yr wythnos erbyn 2020.

Dywedodd y Gweinidog Chwaraeon Alan Pugh, a lansiodd y rhaglen yng Nghanolfan Hamdden Arbertyleri ym Mlaenau Gwent: “Os cewch chi’r chwilen ymarfer pan fyddwch chi’n ifanc, bydd gyda chi am eich oes. Erbyn 2025 ein dymuniad yw i bron bob un person ifanc yng Nghymru fod yn gwneud 5x60 yn wythnosol. Mae cyflwyno’r cynllun mewn ysgolion uwchradd yn gam mawr ar hyd y llwybr hwn.”

Mae’r prosiect yn dilyn ymlaen o fenter Campau’r Ddraig Cyngor Chwaraeon Cymru – a lansiwyd yn 2004 i gael mwy o blant ysgolion cynradd i wneud chwaraeon – ac mae eisoes wedi’i ragbrofi mewn wyth ysgol.
Bydd y gweithgareddau a ddarperir drwy’r rhaglen yn ddibynnol ar y cyfleusterau sydd ar gael yn yr ardal leol, ond bydd yn rhoi lle amlwg i weithgareddau megis aerobeg a dawns, yn ogystal ag ymestyn gweithgareddau megis criced a phêl-rwyd.
Mae yna 28 o ysgolion yn cynnal y fenter ar hyn o bryd, ond disgwylir y bydd staff 5x60 a hyfforddwyd yn llawn wedi’u cyflogi ym mhob ysgol uwchradd yng Nghymru erbyn 2009.

Glyn and Imogen

Ffotograff: Roedd cystadleuwyr Big Brother, Glyn Wise ac Imogen Thomas yn lansiad 5x60

Rhesymeg

Dim ond 24% o blant oedran uwchradd sy’n gwneud 5x60munud o weithgaredd corfforol yr wythnos
Mae plant sy’n symud ymlaen o Gampau’r Ddraig i flwyddyn 7 yn brin o gyfleoedd i barhau gweithgaredd allgyrsiol

Egwyddorion

Y brif nod yw cynyddu’r % o blant oedran uwchradd sy’n gwneud 5 x 60 munud o chwaraeon a gweithgaredd corfforol
Canolbwyntio ar blant sy’n cymryd rhan mewn llai na 5x60 munud
Creu plant sydd wrth adael ysgol yn: gadarnhaol ynghylch chwaraeon a gweithgaredd corfforol, yn fedrus, gwybodus, llawn mynd

Y Targed

Y dangosydd perfformiad allweddol ar gyfer llwyddiant fydd y cynnydd yng nghanran y plant ysgol sy’n cymryd rhan mewn chwaraeon a gweithgaredd corfforol allgyrsiol yn rheolaidd. Y rhaglen hon fydd y prif gyfrwng i gyflawni nod Llywodraeth Cynulliad Cymru o 90% o blant yn cymryd rhan mewn gweithgaredd corfforol rheolaidd a mynych.

Gweithgareddau

Chwaraeon cystadleuol traddodiadol yn blaenoriaethu’r trawsnewid o Gampau’r Ddraig

Gemau o fewn ysgolion / rhwng tai, mini-gynghreiriau, gemau rhwng ysgolion

Gweithgaredd adloniadol anffurfiol

Ystolion tennis / tennis bwrdd, pêl-fasged adloniadol, llwybrau cerdded/rhedeg, codi hwyl, clwb hwyl, rownderi, nofio, pêl foli.

Gweithgareddau a hyfforddir

Hyfforddi chwaraeon, aerobeg, clwb dawns, hyfforddiant cylchol, bocsymarfer

Gweithgareddau yn yr awyr agored
- Brigo tonnau, cerdded mynyddoedd, cyfeiriannu, canŵio, beicio

Rôl Swyddog Datblygu Chwaraeon 5x60

Mae rôl y Swyddog 5x60 yn cael ei chyllido gan Gyngor Chwaraeon Cymru a’i rhedeg ar y cyd â Chyngor Sir Ddinbych. Fy rôl i ydi gweithio gydag Ysgol Brynhyfryd Rhuthun ac Ysgol Uwchradd Y Rhyl i greu cyfleoedd allgyrsiol ychwanegol i blant gymryd rhan mewn chwaraeon a gweithgaredd corfforol.
Fy her i yw recriwtio a hyfforddi trefnwyr chwaraeon gwirfoddol, yn arbennig rhieni a myfyrwyr hŷn ac annog rhai nad ydynt yn cyfranogi ar hyn o bryd i gymryd rhan yn y cyfleoedd yr wyf yn eu creu.

O fewn y swydd mae gennyf sawl maes allweddol i fynd i’r afael â nhw, mae’r rhain yn cynnwys;

Bod yn gyfrifol am ddatblygu cyfleoedd allgyrsiol newydd ac ychwanegol yn yr ysgol ac oddi ar safle’r ysgol
Mewn partneriaeth ag Ysgol Brynhyfryd ac Ysgol Uwchradd Y Rhyl a chyrff chwaraeon perthnasol eraill.
Datblygu cysylltiadau rhwng yr ysgol ac asiantaethau eraill sy’n gweithredu yng nghyffiniau’r ysgol i ddatblygu cyfleoedd chwaraeon a gweithgaredd corfforol.
Gweithio ar y cyd â swyddogion datblygu chwaraeon lleol, staff hamdden, Cyrff Llywodraethol Chwaraeon a chynrychiolwyr addysg lleol i sicrhau bod y rhaglen 5x60 yn cyfannu
Ac yn cysylltu â chyfleoedd datblygu Chwaraeon a Gweithgaredd Corfforol eraill.

Y Nod –

Mae’r rhaglen 5x60 yn amcanu at gynyddu a gwella cyfranogiad pobl ifanc mewn chwaraeon a gweithgaredd corfforol. Drwy ddenu pobl ifanc mewn gwahanol ffyrdd gall ddylanwadu hefyd ar eu hagwedd ehangach, eu hymddygiad, presenoldeb, cyrhaeddiad a chyflawniad.
Rydym yn gobeithio cael effaith ar ddisgyblion, rhieni, athrawon ac aelodau’r gymuned leol er mwyn gwella’r ddarpariaeth a’r cyfle i bobl ifanc gymryd rhan mewn ffurf o weithgaredd corfforol.

Gweithio yn ôl y canllawiau fel y’u gosodwyd gan Strategaeth Dringo’n Uwch Llywodraeth Cynulliad Cymru i gael 90% o blant yn cymryd rhan mewn gweithgaredd am 60 munud 5 gwaith yr wythnos erbyn 2023.

Gwirfoddolwyr -

Er mwyn i’r rhaglen hon gael ei phennu’n llwyddiant, mae’n hanfodol ein bod yn pwyso a mesur ac yn newid y rhaglen yn gyson ble mae angen, ond efallai’n fwyaf pwysig rydym yn disgwyl i’r ysgol gymryd perchenogaeth ar y cynllun ac ymgysylltu’n agos â’r gymuned leol a’r ardal o gwmpas, i ddod o hyd i unigolion brwdfrydig, canolbwyntiedig, o’r un meddwl sy’n benderfynol o wneud gwahaniaeth yn nhermau chwaraeon i’w hardal leol. Efallai na fydd hyn ar ffurf hyfforddi a chyflwyno sesiynau penodol yn unig, ond ar ffurf cyflwyno adroddiadau am weithgareddau, gweithredu fel swyddog y wasg, dod o hyd i gyllid i glybiau a llawer agwedd arall… Os ydych yn teimlo yr hoffech ddod i gymryd rhan cysylltwch â’r Uned Datblygu Chwaraeon i gofrestru eich diddordeb.